Barbara Rossing er prófessor við Lutheran School of Theology í Chicago. Við þekkjum hana af vettvangi Lútherska heimssambandsins. Í dag leiddi hún Biblíulestur á vefráðstefnu Lh um umhverfismál og réttlæti. Hún ræddi um vatnið í Biblíunni.
Á þrítugasta og fimmta gleðidegi viljum við þakka fyrir vatnið og fyrir lífið.
Davíð Þór bloggar um samviskufrelsið. Ég velti fyrir mér hvort við þurfum ekki að greina á milli samviskufrelsis almennt og samviskufrelsis sem er getið um í greinargerðum, starfsreglum eða hefur verið rætt sérstaklega á prestastefnu og/eða kirkjuþingi. Er einhver munur á þessu tvennu?
Nýr vígslubiskup á Hólum er þriðji biskupinn sem við veljum í þjóðkirkjunni á rúmlega tólf mánaða tímabili. Kjörskrá var lögð fram 1. apríl og fyrsti frambjóðandinn hefur stigið fram. Það er sr. Solveig Lára Guðmundsdóttir, sóknarprestur á Möðruvöllum. Við munum að sjálfsögðu fylgjast með og fjalla um þetta biskupskjör eins og hin tvö.
Morgunblaðið hefur tekið viðtöl við Agnesi og Sigurð Árna sem voru efst í fyrri umferð biskupskjörs. Agnes leggur áherslu á fólk fái jákvæða afstöðu gagnvart kirkjunni og að kirkjunnar fólk séu góðar fyrirmyndir:
„Mér finnst skipta miklu máli að fólk fái jákvæða afstöðu gagnvart kirkjunni og finni það að við þjónar hennar viljum af öllu hjarta vera góðir þjónar og koma boðskapnum áfram til fólksins. Kirkjunnar fólk á að vera góðar fyrirmyndir, og við megum ekki gleyma því þegar við tölum um kirkjuna að hún er til vegna trúarinnar.“
Sigurður Árni leggur áherslu á barna- og unglingastarf kirkjunnar, ábyrga nýtingu fjármuna og stuðning við starfsfólk kirkjunnar:
„Ég mun fjölskyldutengja starfið og beita mér fyrir að takmörkuðum fjármunum kirkjunnar verði varið til þess málaflokks. Tekjur kirkjunnar eru almennt mjög skertar í landinu og það þarf að nýta féð gríðarlega vel … Ég mun beita mér sérstaklega í þágu presta, djákna og ábyrgðarfólks í kirkjunni þannig að það fái þann stuðning sem það þarf í sínum störfum.“
Hvaða skilaboð felast í niðurstöðunni í gær að mati frambjóðendanna tveggja? Agnes segir: „Mér finnst þetta vera greinileg vísbending um það að fólk vill fá konu í þetta embætti.“ Sigurður Árni segir niðurstöðuna vera til marks um nútímahugsun í afstöðu kjörmanna: „Þetta er skýrt kall eftir breytingum og kirkjan á að svara því. Kirkjan verður að sækja inn í framtíðina.“
Eftir hádegi í dag hitti ég nemendur við guðfræðideild HÍ til að ræða um miðlun og guðfræði. Nánar tiltekið ætla ég að ræða um notkun nýju miðlana í kirkjustarfi. Ég mun meðal annars koma inn á það sem ég ræddi í erindinu Á nöfinni síðasta haust. Það er tilvalið að horfa á það til upprifjunar og undirbúnings.
Nú er að hefjast kynningarfundur biskupsefna í Glerárkirkju. Þetta er síðasti fundurinn sem er haldinn. Ég ætla að reyna að blogga fundinn í beinni.
Sjö prestar hafa boðið sig fram í biskupskjöri. Framboðsfrestur rennur út 29. febrúar sem er eftir rúmar þrjár vikur svo fleiri gætu átt eftir að bætast við. Þó er líklegt að ef einhver hyggst gefa kost á sér verði það fyrr en síðar því kosningabaráttan er farin af stað. Frambjóðendur og stuðningsmenn þeirra skrifa á vefinn, hringja í kjörmenn, halda fundi og vekja á sér athygli með ýmsum hætti.
Ein spurningin sem við höfum séð og heyrt, meðal annars á Facebook, lýtur að fjölda þeirra sem bjóða sig fram. Einn vinur okkar á Facebook spurði:
Eru allir prestar landsins í kjöri?
Svarið við því er já. Það eru allir í kjöri, en einungis þeir prestar sem gefa kost á sér fá nafnið sitt ritað á kjörseðilinn.
Ekki liggur fyrir hversu margir munu bjóða sig fram. Þau er sjö þegar þetta er skrifað, en gætu allt eins orðið níu eða þrettán áður en yfir lýkur. Er það of mikið?
Athugun á fjölda umsækjenda um sjö prestsembætti leiddi í ljós að umsækjendur hafa verið frá 6-15:
Í þessu ljósi er fjöldi frambjóðenda til biskups Íslands afar eðlilegur. Um er að ræða flott djobb – krefjandi, ábyrgðarmikið, skemmtilegt, umfangsmikið og vellaunað starf með sérstökum skyldum og réttindum.
Hvers vegna ætti fólk sem hefur til þess réttindi og hæfi ekki að sækjast eftir slíku starfi?
Enginn verður óbarinn biskup bloggar Sigurður Árni Þórðarson og deilir sögu af því þegar biskupsefnið var slegið (í góðu þó). – Meira um biskupskjör 2012.
Hvernig samrýmist frumvarp til nýrra þjóðkirkjulaga því markmiði að efla lýðræði innan þjóðkirkjunnar? Sigríður Guðmarsdóttir bloggar. – Meira um biskupskjör 2012.
Í Síðdegisútvarpi Rásar 2 hafa verið tekin viðtöl við þau þrjú sem hafa boðið sig fram í biskupskjöri. Guðfinnur Sigurvinsson hefur verið aðalspyrjandi og frambjóðendur hafa svarað. Viðtölin gefa innsýn í afstöðu frambjóðendanna við upphaf biskupskjörs og eru fyrirheiti um spennandi samtal um kirkju og biskupsþjónustu á komandi vikum:
Ef fleiri bætast í hóp frambjóðenda fáum við vonandi tækifæri til að heyra þau svara Guðfinnsspurningum.
Uppfært 30/1: Tveir frambjóðendur hafa bæst í hóp frambjóðenda og viðmælenda. Færslan er uppfærð til samræmis við það. 6/2: Einum frambjóðanda bætt við. 20/2 Einum frambjóðanda bætt við.
