árni + kristín

Category: Tilbeiðsluráð

Tilbeiðsluráðin eru hugmyndir og innblástur sem nýtist í helgihaldi kirkjunnar og eigin bænalífi. Þessu er safnað saman úr ýmsum áttum. Fyrirmyndin eru „worship tricks“ enska guðfræðingsins Jonny Baker.

Leyfðu okkur að vera hendur þínar

Í dag er dagur kærleiksþjónustunnar í þjóðkirkjunni. Í dag lyftum við upp þjónustunni við náungann sem er kjarnaatriði í kristinni trú og lífi og birtir okkur trúna í verki. Í sögunni af miskunnsama…

Guð.
Á skírnardegi vorum við nefnd með nafni
og þú skrifaðir nafnið okkar í lífsins bók
og ristir nafnið okkar í lófa þinn
eins og við gerðum á unglingsárum
þegar við vorum skotin í einhverjum
og skrifuðum nafnið þeirra í lófann.
Þau nöfn dofnuðu og hurfu þegar lófinn var þveginn,
en nöfnin okkar okkar dofna ekki,
þau er að eilífu í lófanum þínum.
Takk fyrir að þú þekkir okkur og þekkir nöfnið okkar.
Takk fyrir að þú ert okkar Guð.
Amen.

Morgunbæn á Rás 1, 16. apríl 2013. Innblásið af vini mínum Kristjáni Vali sem er uppáhaldsskáld.

Guð.
Þú skapaðir okkur með hjarta og huga og munn.
Til að elska, hugsa og tala.
Orðin okkar geta dregið fólk niður og sært.
Og þau geta lyft í hæðir, huggað og hlýjað.
Viltu gera hjartað okkar hlýtt í dag,
hugsann umhyggjusaman
og munninn farveg fyrir falleg orð.
Þannig að þau sem við mætum í dag fari frá okkur
léttari í spori og glaðari í hjarta.
Vitandi að þau séu metin, virt og elskuð.
Amen.

Morgunbæn á Rás 1, 15. apríl

Guð.
Það er svo gott að upplifa sólina á morgnana.
Sjá hana gægjast upp yfir fjöllin og lýsa upp landið.
Horfa mót henni og píra augun og finna ylinn á andlitinu.
Þiggja næringuna sem er í geislum hennar.
Fyrir það viljum við þakka í dag
og biðja þig að gera okkur að sólargeisla
í lífi fólksins í kringum okkur.
Bæði þeirra sem við þekkjum
og hinna sem við þekkjum ekki.
Amen.

Morgunbæn á Rás 1, 13. apríl.

Guð.
Þú sagðir okkur að vera eins og börnin
til að skilja þig og nálgast þig.
Viltu gefa okkur leikgleði barnanna, lífsgleði barnanna og trúargleði barnanna –
sem eru svo opin gagnvart lífinu og gagnvart þér.
Viltu hjálpa okkur að standa vörð um börnin sem minna mega sín og um barnið í okkur sjálfum.
Amen.

Morgunbæn á Rás 1, 12. apríl.

Guð.
Á hverjum degi upplifum við augnablik
sem gefa tilefni til að gleðjast og vera hamingjusöm.
Stundum sjáum við þau ekki
því við göngum svo hratt gegnum lífið
eða erum upptekin af því slæma.
Viltu gefa okkur ró í huga og hjarta
til að lifa hægt og upplifa augnablikin
þar sem gleðin er fullkomin.
Amen.

Morgunbæn á Rás 1, 11. apríl.

Guð.
Viltu ganga með okkur til Emmaus, eins og með lærusveinunum forðum daga.
Til okkar Emmaus.
Viltu gefa okkur brennandi hjarta
þegar við lesum um þig.

Brennandi munn
þegar við tölum um þig.

Brennandi hendur þegar okkar hendur
sem verða þínar hendur,
til góðra verka í heiminum sem við lifum í.
Amen.

Morgunbæn á Rás 1, 10. apríl.

Guð.
Hjartabrosin eru.
eins og aflstöðvar
kærleikans í lífinu.

Viltu gefa okkur bros á hjarta.
Til að lýsa upp lífið okkar í dag.

Guð.
Viltu gefa okkur bros á varir.
Til að deila með öðrum.
Og gera þannig daginn þeirra betri en hann væri ella.

Guð.
Viltu brosa til okkar í dag.
Svo að við megum brosa til annarra
og séum þannig farvegur fyrir kærleikann þinn.
Amen.

Morgunbæn á Rás 1, 9. apríl 2013

Guð.
Gæðum jarðar er misskipt.
Sumir hafa mikið, aðrir lítið.

Viltu gera okkur meðvituð og þakklát
fyrir það sem við höfum.
Viltu gera okkur meðvituð og örlát
gagnvart þeim sem búa við skort.

Viltu kenna okkur að gefa öðrum
af því sem okkur hefur verið gefið.

Því það er náungakærleikur.
Amen.

Morgunbæn á Rás 1, 8. apríl 2013

Guð.
Í dag og aðra daga
viljum við ganga með þér
í trausti til þess sem þú gefur okkur í öllum aðstæðum lífsins
sem er fullvissan um lífið
og loforðið um lífið.

Viltu láta loforðið þitt
um sigurinn yfir dauðanum
taka sér bólfestu í okkur
og móta bæði líkamann okkar og sálina
þannig að við verðum boðberar lífsins
og þar með boðberar þínir.
Amen.

Morgunbæn á Rás 1, 6. apríl 2013

Guð.
Stundum skiljum við ekki orðin þín.
En þegar við horfum á Jesú,
sjáum hvernig hann mætti fólki af umhyggju og í kærleika,
þá þurfum við ekki að skilja allt.

Því við skynjum hvernig þú mætir okkur
og vitum hvernig við eigum að mæta öðrum.

Af umhyggju og í kærleika.

Viltu gefa okkur að mæta öðru fólki í dag
eins og þú mætir okkur í Jesú.
Amen.

Morgunbæn á Rás 1, 5. apríl 2013.

Guð.
Vorið heldur innreið sína.
Lífið kviknar.
Það birtir á landinu okkar
og í hjörtunum okkar.
Það eru páskarnir.
Tími birtu, tími lífs og tími vonar.
Fyrir það viljum við þakka.
Og yfir því viljum við gleðjast.
Amen.

Morgunbæn á Rás 1, 4. apríl 2013.