Á þrítugasta og öðrum gleðidegi viljum við deila með ykkur hamingjulaginu sem Jónas Sigurðsson og Ritvélar framtíðarinnar gerðu svo vinsælt árið 2010.
Hamingjan er hér. Hún er svo sannarlega hér.
Gleðidagur 32: Hamingjan er hér
Reply
Gleðidagur 31: Krakkar hitta kindur og krabba
Við fórum í sveitaferð með leikskólanum í dag. Sveitaferðardagurinn var öðruvísi dagur þegar við vikum frá hefðbundinni dagskrá leikskólabarna og foreldra þeirra. Þetta var dagurinn þegar við hittum litlu lömbin og kindamömmurnar þeirra. Lékum okkur í heyinu. Tókum upp krossfiska og krabba. Nutum samvista við náttúru og hvert annað.
Það er gott að eiga öðruvísi daga og það viljum við þakka á þrítugasta og fyrsta gleðidegi.
Gleðidagur 30: Alla daga
Í sunnudagaskólanum í gær sungum við lagið Tikki tikki ta. Þar koma meðal annars fyrir línurnar
Alla daga og allar nætur
augu Jesú vaka yfir mér.
Þetta er elskuyrðing því augnatillit Jesú er augnatillit elskunnar. Það eru skilaboðin okkar á þrítugasta gleðidegi.
Gleðidagur 29: Hjarta og hold
Í dag er Megrunarlausi dagurinn. Í lexíu dagsins segir meðal annars: „Ég mun gefa ykkur nýtt hjarta og leggja ykkur nýjan anda í brjóst. Ég mun taka steinhjartað úr líkama ykkar og gefa ykkur hjarta af holdi.“
Okkur finnst viðeigandi að lexían fjalli um nýjan anda og um hold á megrunarlausa deginum sem er auðvitað líka dagur líkamsvirðingarinar.
Í tilefni tuttugasta og níunda gleðidagsins deilum við með ykkur mynd af pönnukökum sem eru uppáhaldsmatur, á megrunarlausum dögum og líka alla hina dagana.
Gleðidagur 28: Grösin í garðinum
Image
Á tuttugasta og áttunda gleðidegi var komið við í Grasagarðinum í Reykjavík. Þar var meðal annars þessi Nykurrós sem gladdi augun. Í dag viljum við þakka fyrir blómin og það sem blómstrar.
Við erum líka þakklát og glöð yfir þeim frábæra unaðsreit sem Laugardalurinn er. Þar skapast rými fyrir fjölskyldur og einstaklinga af öllum stærðum og gerðum til að eiga góðar stundir og njóta lífsins. Það er t.d. sérlega vel til fundið að setjast niður í Café Flóru eftir göngutúr í Grasagarðinum og Fjölskyldu- og Húsdýragarðinum. Falleg og vinaleg kaffihús eru dýrmætir reitir og draga fram gæði borgarlífsins. Þau þurfa að vera út um allan bæ – ekki bara í 101.
Þrjú í biskupskjöri á Hólum
Þrír prestar bjóða sig fram til þjónustu sem vígslubiskup á Hólum. Það eru:
- Gunnlaugur Garðarsson, sóknarprestur í Glerárkirkju á Akureyri
- Kristján Björnsson, sóknarprestur í Vestmannaeyjum
- Solveig Lára Guðmundsdóttir, sóknarprestur á Möðruvöllum
Á pinboard eru vísanir á umfjöllun um vígslubiskupskjörið sem verða uppfærðar eftir því sem tími gefst til. Samkvæmt mbl.is er gert ráð fyrir að kjörgögn verði send út um miðjan maí og að talningu verði lokið innan tveggja vikna frá því. Það ætti því að liggja ljóst fyrir hver mun þjóna Hólum þegar Agnes Sigurðardóttir verður vígð 24. júní.
Gleðidagur 27: Helgin
Vikulega er skipt um takt í lífinu. Þá er helgi. Helgin er tími fjölskyldu og upplifana. Tími ferða í sundlaugarnar og Húsdýragarðinn. Tími grillsins. Tími leiksins og þess sem er skemmtilegt. Helgin er líka kirkjutími þegar við sitjum saman og upplifum samfélagið og þiggjum næringu til anna hversdagsins.
Helgin er dýrmætur hluti af lífinu og fyrir hana viljum við þakka á tuttugasta og sjöunda gleðidegi.
Gleðidagur 26: Fjölmiðlafrelsi fylgir fjölmiðlaábyrgð
Í dag er Dagur fjölmiðlafrelsisins. Í tilefni dagsins viljum við rifja upp reglurnar fimm sem Dan Gillmor setur fram í Mediactive. Þær eru hugsaðar fyrir okkur sem miðlum á vefnum:
- Þú skalt vinna heimavinnuna þína. Svo skaltu bæta um betur. – Do your homework, and then do some more.
- Negldu það. Alltaf. – Get it right, every time.
- Vertu sanngjarn við alla. – Be fair to everyone.
- Hugsaðu sjálfstætt, einkum um eigin fordóma. – Think independently, especially of your own biases.
- Vertu gagnsæ og gerðu kröfu um gagnsæi. – Practice and demand transparency.
Þetta eru góðar vinnureglur og ágætis útgangspunktur þegar við íhugum miðlun okkar bloggaranna á degi fjölmiðlafrelsisins.
Á tuttugasta og sjötta gleðidegi viljum við þakka fyrir góð vinnubrögð og gleðjast yfir tækninni sem gerir fleirum mögulegt að miðla og halda úti eigin fjölmiðlum.
Dagur fjölmiðlafrelsisins
Aside
Forseti og aðalritari WACC – World Association for Christin Communication skrifuðu opið bréf í tilefni af Degi fjölmiðlafrelsisins 2012:
On World Press Freedom Day 2012, as we celebrate the advancements made towards press freedom around the world, we urge media practitioners – professional and citizen journalists – collectively to find common ground in efforts to agree on professional standards and codes to guide the practice of journalism. An international code of ethics for citizen journalism would provide a much needed framework for new voices working to transform societies.
Blaðamenn hafa siðareglur. Myndu siðareglur fyrir okkur hin sem rekum okkar eigin fjölmiðla ekki gera gagn líka?
Gleðidagur 25: Almodóvar í góðra vina hópi
Að horfa á myndband er góð skemmtun. Það er enn skemmtilegra þegar horft er með góðum vinum. Í gærkvöldi sáum við kvikmyndina La piel que habito með félögum okkar í Deus ex cinema. Þetta er mögnuð mynd um úrvinnslu sárrar reynslu. Það voru heiðurshjónin Leifur og Sigga sem buðu til sýningarinnar. Leifur gerði listaverk í gestabókina sem prýðir þetta gleðidagsblogg.
Á tuttugasta og fimmta gleðidegi gleðjumst við yfir kvikmyndalistinni, sköpunargáfu kvikmyndagerðarfólks um veröld víða og skemmtilega fólkinu sem við horfum reglulega á bíómyndir með.