Fyrir síðustu jól kom út dvd diskurinn Daginn í dag. Hann naut mikilla vinsælda og færði sunnudagaskólann inn í stofurnar um allt land. Í sumar tók Daginn í dag-gengið sig til og bjó til stutta þætti sem verða sýndir í barnamessum í vetur. Við ákváðum að gera svolitla tilraun í Brautarholtskirkju og nota iPad spjaldtölvu til að sýna þættina.
Brautarholtskirkja er lítil sveitakirkja sem heldur vel um söfnuðinn. Krakkarnir komu sér fyrir fremst í kirkjunni og horfðu andaktug á Hafdísi og Klemma sprella og boða. Það er gaman að geta boðið upp á þetta efni og við hlökkum líka til að prófa okkur áfram með tæknina.
Einn af lyklunum við vel heppnað helgihald er að lánast að nýta rýmið sem er til staðar hverju sinni. Það sem passar vel í stórum nútímakirkjum hentar kannski ekki eins vel þar sem kirkjuhúsið og búnaður er allur annar.
Það er okkar mat að spjaldtölvan henti vel í litlu sveitakirkjunni þar sem ekki eru græjur eins og sýningartjald og skjávarpi. Hún styður við sterku hliðarnar á helgihaldi í sveitakirkjunni – sem er nándin, látleysið og einfaldleikinn.
Skildu eftir svar við Árni Svanur Hætta við svar