Eru konur kjánar?

Í Morgunblaðinu í dag er birtur pistillinn Kjánahrollur ársins. Þar er á gamansaman hátt fjallað um ýmsar uppákomur á árinu sem er að líða sem blaðamanni þykja neyðarlegar,  hallærislegar og kjánalegar. Meðal þeirra eru:

  1. Opnun Lindex
  2. PR-trikk Steinunnar Birnu
  3. Grjótkastsorð Vigdísar Hauksdóttur
  4. Ásókn íslenskra stúlkna í þekktan leikara
  5. VIP-partý og yfirlýsingar Hildar Lífar og Lindu Ýrar

Sjö ljósmyndir eru birtar með umfjölluninni. Á fjórum myndum eru konur í forgrunni og myndin frá opnun Lindex sýnir aðallega konur (og það eru konur á tveimur myndum til viðbótar). Lesandi sem skimar síðuna, les fyrirsögn og skoðar myndir gæti hæglega dregið þá ályktun að konur væru aðalkjánarnir í ár. Konurnar sem vildu gera góð kaup í Lindex toppa listann.

Ágætis tímakaup

Fyrir tveimur dögum vakti Morgunblaðið einnig athygli á verslunarhegðun þeirra sem vilja gera góð kaup en útsala á Apple vörum milli jóla og nýárs rataði á forsíðu blaðsins. Flottur strákur sem hafði lagt mikið á sig til að kaupa sér tölvu gerði  góð kaup þennan dag. Hann var tekinn tali og sagt frá tölvukaupunum hans undir fyrirsögninni „Þetta er ágætis tímakaup“. Í fréttinni kom einnig fram að allar útsöluvörurnar seldust upp á innan við klukkustund.

Við vonum að strákurinn sem keypti sér MacBook Pro tölvu fái ekki sömu útreið hjá Morgunblaðinu og fólkið sem vildi kaupa barnaföt á góðu verði í Lindex.

Við spyrjum: Hvers vegna er sniðugt að bíða í biðröð til að kaupa tölvu á góðu verði, en kjánalegt að bíða í biðröð til að kaupa barnaföt á góðu verði?

In

One response

  1. Nákvæmlega.
    Ég gerðist svo fræg að fara í margnefnda verslun þónokkru eftir að hún opnaði og beið reyndar ekki í neinni biðröð. Yfirhöfnin sem ég keypti á dótturdóttur mína kostaði nákvæmlega 6000 krónum minna en sambærileg flík í annarri verslun í sama verslunarkjarna. Mér fannst ég bara allas ekkert kjánaleg skal ég segja ykkur.

Skildu eftir svar

Netfang þitt verður ekki birt.

This site uses Akismet to reduce spam. Learn how your comment data is processed.